Tuesday, May 31, 2005

كنز الجنان

هو الجنان كنز ؟؟؟
سؤال عجيب ؟؟؟
يمكن
سؤال عبيط ؟
احتمال
هوه سؤال مريب ( ايه الحكاية جنان ايه وبتاع ايه )
السؤال لازم مايكونش " هو الجنان كنز ولا لأ...؟ "
انما السؤال الصح "هو الجنان كنز واحد ولا اكتر...؟"
اظن انه اكتر كتير
الجنان مش هوه الجنون ... ازاى ... اقولك الجنان بيحمى وبيعفى من حاجات كتير بس فى نفس الوقت بيديك كامل الحرية فى زمن اللاحرية ده فى انك تعمل ماتشاء وقت ما تشاء حيثما تشاء يعنى بمزاجك وبكيفك وبراحتك وماحدش له حاجة عندك انت عايش مع نفسك
انما الجنون مشكلة تانية خالص (هوه برضه بيديك حرية كويسة والله مش وحشة وبيريحك من الواقع بمشاكله كلها) انما ممكن المجنون يضر نفسه مثلا او يضر حد من الى حواليه ....
والجنون يعنى مافيش عقل...
انما الجنان ممكن يكون منتهى العقل
المجنون منفصل عن الدنيا دايما او فى اوقات عشوائية مالوش اختيار فيها
انما المتجنن بيختار الوقت الى هوه عاوزه علشان يبنى العالم الى على مزاجه(*) ويعيش فيه براحته ولما يزهق يبقى يهده بمزاجه برده ويبنى العالم الى هوه عاوزه
________
(*) على مزاجه : مصطلح قديم يعنى انه يعمل الى يمزززززززجه من الاخر يعنى من غير ماحد يديله على قفاه ويقوله انت عبيط ياله او يقوله انت ازاى تعمل كذا
المهم
الى عاوز امارسه هنا جنان من نوع خاص
جنان مفيد جدا ( ليا طبعا )
ممكن يتوصف بحاجة واحدة بس
تقدر تسميه انطلاق
فضفضة
اى حاجة ممكن تتكتب بدون هدف بدون سبب بدون نتيجة او امل فى حاجة خالص
تفريغ
اى حاجة
ممكن فى يوم اكتب شعر
ممكن اوصف فى يوم وصفة طبيخ
ممكن اتكلم فى السياسة
ممكن ممكن اتكلم فى التكنولوجيا واخر ماوصل اليه البتنجان ( العلم الحديث )
ممكن اى حاجة تكون مكتوبة هنا بس فى حدود الادب (يعنى نختلف اه نجرح بعض لا ...... مع الاعتزار لنانسى عجرم )
بمناسبة نانسى عجرم والستات الى كانوا زعلانيين منها وبيقولوا ان اجوازهم اتهبلوا الواد ابنى لسة 10 شهور لما بيسمع اغنية نانسى "قول تانى كدة" مش عارف ايه الى بيحصله بيسيب كل حاجة فى ايده ويركز ويقعد يرقص ويطنطط حاجة فى منتهى العجب
لا وكان يشوف روبى يهز دماغه يمين وشمال ويعترض (بس الحمد لله الامور اتغيرت شوية فى نص الشهر العاشر ومع نزول الاغنية الجديدة بتاعت التعبان ابتدى يهز شوية معاها ومايعترضش)
المهم نرجع للجنان تانى ....
من الاساس انا مش عارف انا باكتب الكلام ده ليه ولا لمين ولا هاكمل ولا لأ بس بصراحة انا قريت مكلمة زى ماحب اسميها او مدونة زى ماسماها الاستاذ صاحب beyondnormal
وهى مدونة او مكلمة راقية جدا واصبح لها متابعين ومعلقين وحاجات جامدة كدة
فقلت فى عقلى بالى طب ياواد ماتدوس ويمكن ربنا يكرمك وتبقى واد كلامنجى قد الدنيا وخصوصا والعبد لله رغاى رغى لو ابتديته من هنا يخلص فى جنوب افريقيا .
طب هاتكتب ايه ياواد هاتقول ايه ياواد مش مهم (على رأى اللمبى) المهم انك تقول
طب ايه القضية ؟ سياسة ولا ادب ولا فن ولا ايه حكايتك قلت لنفسى اسمالله عليا خلاص مادام لازم تكون فيه قضية تبقى قضية اللاقضية الفراغ الاستعداد التام لطرح كل شئ مع مراعاة احترام الخالق والاديان واحترام حبى الوحيد مصر مع الاستعداد التام للكلام عن كل حاجة بتحصل على الكوكب العجيب بتاعنا الى ماحدش عارف اخرت لفه ودورانه حوالين الشمس ده ايه
خلاص بقى كفاية كدة النهاردة